ايهاب شوقي علي سالمان

لازم يكون في أمل

أؤمن كالكثير منا بان التغيير لن يأتي الينا طواعية وان من اراد شيئا فعليه ان يسعي اليه وبقوة ومن دون تردد وعلينا أن نؤمن دائما وابدا بان هناك الكثير من الصعاب التي تملئ المستقبل ولكي نحقق ما نريده يجب ان نشارك في تحقيقه
فليس من العدل ان تكون بلدنا مطمع لدول كثيرة نظير ثرواتها ويوجد من يعيش داخل حدود هذا البلد من ينام جائعا او يفترش الرصيف او تحت كوبري لانه لا يجد سكنا يأويه او مريض لا يجد له سرير داخل مستشفي حكومي لعلاجه – وان وجد السرير لا يجد العلاج ؟
كيف يموت ابناء هذا البلد في طابور العيش وهو يحاول ان يحصل علي قوت يومه ؟ كيف ياتي علينا يوما نستورد فيه القمح ونحن نمتلك كل هذه الاراضي الزراعية ؟ فمن لا يمتلك قوت يومه لا يمتلك قراره وهو ما حدث معنا في عهد الفساد والسرقة
ومن هذا المنطلق بنيت اهدافي الانتخابية – وهي كالتالي:
اولا: القوانين والتشريعات:
لازم يكون الدستور بيحمي جميع المصريين – لازم القانون يكون بيدي المصريين حقهم الاول وبعد كده بيحاسبهم – لازم قانون الطوارئ يتلغي – لازم الغاء المحاكمات العسكرية للمدنيين – لازم القانون يكون خالي من الثغرات – لازم فصل الجهات الرقابية عن التنفيذية – لازم الفصل في الوظائف (يعني الوزير يجب الا يكون رجل أعمال)
ثانيا: الملفات الاستراتيجية للمواطن البسيط (رغيف العيش – السكن – الكهرباء – النظافه-..)
1- لازم نلاقي رغيف عيش يتاكل مش مليان رمل وزلط واعواد كبريت – وده مش هايحصل الا من خلال اعادة زراعة القمح في مصر وتشجيع الفلاحين ودعمهم من الدولة لزراعته وكذلك توفير ودعم الادوات المساعدة للمخابز وتسهيل رخص انشاء المخابز ثم بعد ذلك التاكد من ان الجهات الرقابية تراقب بشدة وتطبق عقوبات علي المخابز المخالفة
2- اعادة النظر في طريقة حساب استهلاك الكهرباء والمياه وكذلك تقليل الدعم الموجه الي اصحاب المصانع المستهلكه للكهرباء وهنا اطالب بتقليل الدعم علي الكهرباء في المصانع وليس رفع الدعم باكمله وذلك لتشجيع الاستثمار – كما يجب فصل مصروفات النظافه (الغير مبررة) عن فاتورة الكهرباء – (ولمل يكون عندي مشكلة في الفاتورة لازم يتحقق فيها الاول وبعد كده أدفع – مش يقولي ادفع وبعد كده اشتكي)
3- لازم تعديل قانون الايجار الجديد بالشكل الذي يضمن للمالك حقه وكذلك المستأجر – وفي نفس الوقت لازم تكون مدة الايجار علي الاقل 5 سنوات – وكذلك قيمة الايجار الشهرية لازم تكون وفق معايير يعني كل منطقه يبقي ليها متوسط اسعار – لان دي مش المفروض تخضع للعرض والطلب
4- لازم تفعيل قانون الرقابة علي الاسواق وخاصة للسلع الاستراتيجية للمواطن المصري – دي لازم يكون ليها حد اقصي في الاسعار لا يزيد عنه مهما كانت الظروف والمتغيرات
ثالثا: قانون العمل والاستثمار:
1- لازم تعديل قانون العمل بالشكل الذي يضمن للموظف وصاحب العمل حقوقهم سواء
2- لازم الغاء فكرة ان الموظف يمضي استقالته وهو بيمضي عقد تعيينه (عشان يأمن حياته لمدة واضحه)
3- لازم تفعيل المادة الخاصة بنسبة تعيين المعاقين لانهم مصريين وليهم حق العمل والعلاج زي كل مصري – ولازم تعديل العقوبة وتغليظها علي المخالفين
4- لازم وضع قانون يجبر المستثمر علي تعيين نسبة ثابته من اجمالي العاملين لديه من اهالي (المحافظة – الدائرة) ولتكن 10% او 20% مقابل تسهيل اجراءات استثماره في هذا المكان وبكده هانقدر نقلل نسبة البطالة ونشجع المستثمرين علي الاستثمار
رابعا: التعليم:
1- لازم المناهج التعليمية تتغير عشان تواكب تطور العالم وتخاطب عقل الطالب
2- لازم يكون في حصص ومحاضرات خاصة بالمهارات الشخصية والتنمية البشرية والفكرية
3- لازم المناهج تكون عملية اكثر ومعتمده علي التجربة وليس الحفظ
4- لازم المدرسين يخدوا مرتبات وامتيازات كتيرة عشان يقدر يشتغل وهو أمن علي حياته ومستقبله
5- لازم المدرسين تحضر دورات تدريبية ويكون عليهم رقابة لانهم لازم يتطوروا مع المتغيرات اللي بتحصل
خامسا:
حلوان لازم تستعيد دورها السياحي ولازم نكون من مصار الدخل السياحية للبلد – حلوان كانت تشتهر بانها مشفي طبيعي – ليه مانحاولش نرجعها تاني – لازم نحاول نرجع الدور السياحي لحلوان تاني – لازم نخلي السياح تيجي تزور حلوان لان ده هايعود علي اهالي حلوان بالنفع – في ناس كتيره هاتشتغل وده هايكون طريق تاني عشان نحارب البطالة – لازم يكون فيه تعاون كبير بين اهالي حلوان والمسئولين ورجال الاعمال بحلوان والتجار في اعادة دور حلوان السياحي
سادسا الامن:
لازم نضغط عشان نرجع الامن لبلدنا ونوقف المهازل والانتهاكات والتهديدات اللي بتحصل
ولكن الامن اللي عاوزينه هو الامن اللي يحترم المواطن داخل اقسام الشرطة – الامن اللي بيتعامل مع المواطنين علي انهم شركاء في البلد – الامن اللي يحترم كرامة المصري – وهو ده اللي لازم يحصل وهنراقب اداء الشرطة واي انتهاك يحصل هانحاسب وزير الاخلية مش بس لو حصل انتهاك لحقوق مواطن لكن اداء الوزارة ككل من مرور واقسام شرطة ونجده طريق وتامين سرقات وغيره – لازم كل واحد يقوم بوظيفته واي مقصر لازم هايتحاسب
واخيرا
عاوز اقولكم حاجه كمان …سياسة اننا نستنا نشوف عضو مجلس الشعب هايعمل لنا ايه اثبتت فشلها واكدت ان مفيش حاجه بتتعمل وده باين جدا لو كل واحد فينا بص حوالية هايلاقي كل حاجه زي ما هي من عشرات السنين ان لم يكن اسوأ
عشان كده ان شاء الله هاشكل لجان مشاركة شعبية من كل منطقه داخل الدائرة الانتخابية لان مفيش اي واحد هايقدر يعرف كل المشاكل اللي بيعاني منها الناس لوحده هاتكون مسئولية اللجان دي التواصل مع اهالي المنطقه وحصر المشاكل وهاجتمع معاهم بشكل دوري وهاساعدهم في الوصول للمسئولين عشان نحل المشاكل دي ولو اكتشفنا اي تقصير هايكون في مجلس الشعب استجوابات ومحاسبة لكل واحد قصر في اداء عمله ولن نسكت عن اي اهمال او فساد